أصل القضية … “أصل القضية”… مفاهيم رسّختها وإلهامات لا تُنسى .. بقلم/ محمد أحمد أبوبكر .. باحث بمركز الخبراء العرب
📩 رسالة من بريد القراء
تصلنا رسائل لا تُقرأ بالحواس، بل تُلامس شيئًا عميقًا في دواخلنا… وهذا ما فعلته كلمات الدكتور (عبد الرحيم الفادني) من الدوحة.
رسالة تفوح بصدق المغترب الذي لم تغرب شمس الوطن من قلبه، وتفيض بوفاء جالية جعلت من “أصل القضية” زادًا فكريًا، ومرآةً لوجدانها و همومها وآمالها.
أن تصبح مفاهيم كـ”الدولة الوظيفية”، و”القوة الناعمة المضادة”، و”الجسر والمورد”، جزءًا من النقاش اليومي في مجالس الخارج، فتلك شهادة لا تُمنح بالكلمات… بل تُنتزع بالمواقف.
> أكتب هذا التمهيد لا لأتحدث عن نفسي، بل لأردّ جميلًا و وفاءً، لأقول:
أنتم الأصل… وأنتم القضية.
وما كان للكلمة أن تبلغ هذا المدى، لولا أنكم وسّعتم لها في صدوركم مقامًا.
فإلى فحوى الرسالة:
“السلام عليكم ورحمة الله وبركاته
ابننا العزيز الاستاذ / محمد أحمد أبوبكر،،،،
أنا من متابعيك الدائمين عبر منصة الخبراء العرب ، وكنت ساكت طول الوقت، أقرأ مقالاتك وأتأمّل فيها… لكن بصراحة حسّيت إنو لازم أكتب ليك الكلام دا، من باب الوفاء أولًا، ومن باب الاعتراف بتأثير عمودك علينا كجالية سودانية برة البلد.
عمودك “أصل القضية” بقى عندنا حاجة كبيرة بجد…
ما بس مقال نقرأو ونتخطاه، لكن مرات كتيرة بنقيف قدام جملة واحدة ونقول: ياخي الزول دا جواهو كلام بنفكر فيهو لكن ما قدرنا نعبر عنو.
مفاهيم رسخت فينا
في عمودك عرفنا يعني شنو “الدولة الوظيفية”، ويعني شنو “القوة الناعمة المضادة”، وحتى “الجسر والمورد”، اما كلامك عن تكية الأمل فدا مدرسة في الاقتصاد ورفع درجة الوعي في المجتمع… المفاهيم دي بقت جزء من كلامنا وتفكيرنا في جلساتنا، وسط زملائنا في الدوحة.
أنا شخصيًا مرات بقول للناس هنا: في شاب سوداني بكتب بوعي مختلف… في عمود اسمو “أصل القضية”؛ أنصحكم تقروا ليهو.
إحساس غريب… لكن صادق
الجميل في كتابتك إنك ما بتتكلم من فوق، ولا كأنك ناصح…
بتكتب وكأنك واحد مننا، من نفس الحلة، الحوش، الحارة…
ويمكن عشان كدا بنحس إنك ما غريب، وإنك بتمثل صوتنا.
وجهة نظر بسيطة، لكن صادقة
على فكرة، لاحظت إنو في ناس كتار بقت كتاباتهم قريبة من طريقتك.
واضح إنو أسلوبك بدأ يأثر ويظهر في كتابات تانية، ودا شيء طبيعي لما تكون الكتابة أصيلة وبتلامس الناس.
خطوة فكرنا فيها كمغتربين
أنا ومعاي بعض الإخوة من الجالية السودانية هنا في قطر، اقترحنا على رئيس الجالية نكتب خطاب رسمي نرفعو للسفارة، نوصي فيه رئيس مجلس الوزراء د. كامل إدريس بأنو يختارك ضمن طاقم المكتب الاستشاري ليهو.
بصراحة، البلد محتاجة لناس زيك… شباب بيفهموا الواقع، وعندهم طريقة جديدة في التفكير، مش بتاعة تنظير ساكت، لكن فيها حلول حقيقية ومواقف وطنية.
ونتمنى بالخطوة دي نكون ساهمنا انو نقدم شي للسودان.
اقتراح بسيط
لو في طريقة نخلي العمود دا صوت مسموع – في بودكاست أسبوعي، ياريت تواصل الفيديوهات القصيرة (كلام من القلب) دا حيكون مفيد جدًا، خصوصًا للناس البتتابعك من برة السودان.
ويا ريت لو تجمع لينا أهم المفاهيم والموضوعات في كتاب … نحتفظ بيهو، ونشارك بيه الناس.
و أختم ليك بجملة بسيطة:
> نحنا وراك… وبنقرأ ليك، وبنستفيد، وبنفتخر بيك.
و”أصل القضية” بقى جزء أصيل فينا..
تحياتي،،،
د. عبد الرحيم إبراهيم الفادني(أبو متاب)
الدوحة – قطر
السبت: ٥يوليو٢٠٢٥ | ١٠محرم ١٤٤٧”
