أعلن البنك المركزي في السُّودان تمديد فترة إستبدال العملة حتى السابع من يناير القادم.
فترة استبدال العملة فئتي ( ٥٠٠ ، ١٠٠٠) جنيه كانت قد انطلقت في العاشر من ديسمبر العام ٢٠٢٤م و حُدّدَ لها حتى الثالث و العشرين من ديسمبر قبلَ أن يتِم تمديدَها حتى الثلاثين مِن ذَاتِ الشهر.
قُبيلَ خِتام العام ٢٠٢٤ في الحادي و الثلاثين مِن ديسمبر تمت للمرة الثانية تمديد فترة استبدال العملة حتى السابِع مِن يناير القادِم العام ٢٠٢٥ ميلادي.
البنك المركزي أشَار لعدم تمكُّن كثير مِن المُواطنين مِن استِبدَال العُملة لِذَلِك جاءت مُهلة التمديد الثانِية.
أحد ظُرفاء المدينة واصِفاً حالة البنك المركزي يقول: (المركزي مع تبديل العملة زي قصة الزول مع سورة الكافرون وقتين غلبتو النهاية و الناس بعاينو ليو غلبتو قامو قالو ليو: الدخلك الحسكنيت ده شنو).
(دحين هسي البرهان بكون مع جابر يقول ليو: هي ناقصة كان موديننا الحسكنيت ده؟!).
مع خواتيم العام ٢٠٢٤ ميلادي و قفل الحسابات و الميزانيات (ناس المالية) فتحوا استيراد العربات الصوالين و مركبات النقل العام.
(غايتو العام ٢٠٢٥ ميلادي خاشي بالتقيل و برضو القرار بتاع فتح إستيراد العربات) يشمل: عربات نقل البضائع و الآليات و العربات المخصصة لأغراض مُحددة.
القرار استثنى من فتح الإستيراد: الكرين و الونش و الرافعات الشوكية و آليات تمهيد التُربة و الحاصِدات الزِراعية.
و جبريل وزير المالية (بقا زي زول الضُمَنَة الخايف تتمسِك عِندو البِلاطة و تِتحسِب ليو خمسين قامو لزو لهم شروط كده و لصقوها في ناس الجمارك حتة ترشيد الإستيراد عشان يتناسب مع إستيعاب شبكة الطُرقُ).
(غايتو دي زنقة شديدة ، نقول يامُعين).
