بعد إقتراب القوات المسلحة من مشارف عاصمة الجزيرة مدني تعالت وتقافزت كتابات هنا وهناك تدعو للتفاوض والجلوس إليه ! .
الدعاوي وإن كانت مقبولة جوهرًا لكن التوقيت غريب وبعضهم مشى أبعد إذا عقد مُقارنة بين تقدم القوات المسلحة صوب ( مدني) سيكون مدعاة لسقوط ( الفاشر) ! .
الغريب في الأمر أنَّ جُلهُم تراهُ ملكيًا أكثر مِن الملِك !
والأغرب من ربط تغيير محدود في مؤسسات الرئاسة بالجارة جنوب السُّودان بأنهُ يؤثر على منظومة الشرق الأوسط وظهور تحالُفات خفية قديمة السطح وذات المسؤول مجدوا أدوارِه حينما قاد مفاوضات جوبا ولحِق بها ( حركات الكِفاح المُسلَح ) والآن صاروا قلقين من منصِبِه الجديد ! .
تعالوا نخُت الكورة وااااطة لا “قلواك ، البرهان ، أردوغان ، السفير السعودي ” ولا ( ق د س ) ماسكين الدفاتر والأقلام والسلاح والأكسجين زاتو كان دايرين تقولو عن ( الشعب )
ياااااخ ( الشعب ) ده الأزمة دي طلعت صالحو و طالحو ، فشنو الغزل المُنمق بتاع العبارات والكلمات ده مابمشي فيو فهمتو ياناااااس ؟!
تعالو ليو بررررررة في النقعة الشمس نص السما وقولو لو واحد اتنين تلاتة
غلطنا في كده وعلينا كده ودحين كده وبعد داااااك ترضو حكمو ، غير كده ياهو بتخلو الزول يشيل ويكب في الشاي اللحمر وبعد ده غلبو يكتب الكلام كلو !
خُلاصة القول : الشراب من تحت يدين الرجال عطش وماتبارو درب القش عشان سكتو عطش مادام في آخر الخفير غفير متحكم في البلف ، فهمتو يابشر ؟
